🔒Хаагдсан: Хонгконгд 1 жилийн сурагч солилцоо

Хонгконг (хятадын тусгай захиргааны бүс) нь 7.5 сая гаруй хүн амтай, Макаогаас зүүн тийш 60 км зайд Сувдан голын эхийн эсрэг талд оршдог. Газар зүйн хувьд Хонконг нь Хонгконг арал, Ковлун хойг, Шинэ нутаг дэвсгэр болон бусад 200 гаруй арлуудаас бүрддэг. Хонгконг нь чийглэг субтропик уур амьсгалтай ба зундаа бороо, хур тунадас ихтэй ч дулаан агаартай байдаг бол өвөл нь хүйтэн сэрүүн салхитай болдог. Хонгконг хүмүүс нь өгөөмөр, найрсаг, хариуцлагатай мөн маш хичээл зүтгэлтэй хүмүүс байдаг.
Хонгконг гэр бүл нь хүүхдийнхээ боловсрол, хүмүүжилд ихээхэн анхаарч зөв хүн болж төлөвшихөд нь тусалдаг. Гэр бүлтэйгээ халуун дотно уур амьсгал бүрдүүлж, хамт цагийг өнгөрөх нь хонгконг айлын томоохон нэг соёл юм.

Хонгконгийн боловсролын систем нь хувийн болон улсын сургуулиудын хоёуланд маш сайн чанартай байдаг. Бага ангийн боловсрол зургаан жил, дунд ангийнх гурван жил, ахлах сургууль нь гурван жилээс бүрдэнэ. Хонгконг нь Боловсролын яамнаас боловсруулсан үндэсний сургалтын хөтөлбөрөөр хичээллэдэг бөгөөд хичээлийн жил нь 9-р сараас 7-р сар хүртэл үргэлжилдэг. Хичээл нь долоо хоногийн Даваагаас Баасан гарагийн хооронд 8:00-аас 16:00 хүртэл ордог. Хятад, англи хэл, математик, шинжлэх ухаан, нийгмийн ухаан ба гадаад хэлийг заавал суралцдаг ба үүнээс гадна өөрийн сонирхож буй чиглэлээр хичээлүүд сонгон суралцах боломжтой.
Ихэнх ахлах сургуулиуд спорт, хөгжим, урлаг, соёл, шинжлэх ухааны клуб зэрэг олон төрлийн хичээлээс гадуурх үйл ажиллагаануудыг санал болгодог.

Хонгконгийн албан ёсны хэл нь англи болон хятад хэл юм. Хонгконгийн дийлэнх хүн ам Хятадын Кантон мужаас гаралтай тул кантон хэлээр эсвэл бусад Yue/Юэ бүлийн хятад хэлээр ярьдаг бөгөөд цөөн тооны хүмүүс Хакка хэлээр ярьдаг. Үүнээс гадна Хонгконгод Япон, Солонгос, Индонез, Тайланд, Филиппин, Въетнам, Герман, Франц зэрэг хэлээр ярьдаг.

Хонконг өсвөр насныхан хотын үзэсгэлэнт газруудаар алхаж, найз нөхөдтэйгээ ярилцан, тоглоом тоглох, кино үзэх зэргээр чөлөөт цагаа өнгөрүүлдэг. Хонконг өсвөр насныхан олон төрлийн спорт, урлагаар хичээллэж, өдөр тутам өөрсдийгөө хөгжүүлж байдаг.

Хонгконгийн үндэсний хоолонд ихэвчлэн цагаан будаа, төрөл бүрийн ногоо жимс, махан болон далайн бүтээгдэхүүнүүд ордог. Тэндхийн хамгийн алдартай хоолнуудын нэг бол үхрийн махтай гоймонтой шөл юм. Энэхүү хоол нь үхрийн махны шөлийг олон төрлийн халуун ногоо, амтлагчаар амталж, дээр нь гоймон, байцаа, хэрчсэн мах тавьсан байдаг.

Монгол хүүхдүүд хост гэр бүлтэйгээ халуун дотно харилцаа үүсгэж, хятад, англи хэлний чадвараа дээшлүүлж, олон төрлийн амтат хоолнуудыг зооглон, мартагдашгүй дурсамжууд бүтээж ирэхийн сацуу маш нээлттэй, өөртөө итгэлтэй, эерэг үзэл бодолтой болж, олон хувь хүний хөгжлийн чадваруудыг суулган ирдэг билээ.